Otterberger Lieder


Otterberger Lied Version 1

Download Lied

Gesang Günter Mannweiler

(Text, Musik und Gesang: Günter Mannweiler)

Otterberger Lied Version 2

Download Lied

Gesang Klaus-Dieter Bernhardt

(Text und Musik: Günter Mannweiler / Arrangement und Gesang: Klaus-Dieter Bernhardt)

Text Otterberger Lied

Refrain:

Ich denk so oft an Otterbersch,

wo die Kerch so machtvoll steht.

Un wo mer um die Kerch erum

durch enge Gässjer geht.

Wo alte schiefe Heisjer stehn,

wo´s bucklich Plaschder leit.

Ja, des is moi alt Otterbersch

aus moiner Kinnerzeit.

Ja, des is moi alt Otterbersch,

so nah un doch so weit!

Strophen:

1.
Wie war die Zeit als Kind so schä 

im alte Otterbersch

Das merksch du leider später erscht,

wann du mol älter wersch.

Mach nor emol die Aue zu,

genieß denne Moment:

Dann siehsch du wie der klääne Bu,

durch die Gasse rennt.

2.
De Summer honn ich jede daa

am Badweiher verbrung.

Vom Briggelche bin ich beherzt

in de große Weiher gesprung.

Die Umkleid war e Bretterbud.

un des war int´ressant:

Do hann mer Lausert als emol

durch die Löchelcher gespannt

3.
Im Herbscht gings uff de Bersch enuff,

do sinn die Keschde gefall.

Im Grumbeerkeller hann die sich 

de ganze Winter gehall

Vum Gääßebersch mit Todesmut

bin ich m´em Rodler geflitzt

E Speckschwart war moi Kufewachs,

was hann die Dinger geblitzt!



Otterberg moi Städtche

Gesang Günter Mannweiler

(Text, Musik und Gesang: Günter Mannweiler)

Text Otterberch, moi Städtche

Günter Mannweiler

 

Ich werd se nie vergesse moi  Zeit als kläner Bu.

Un no moi’m kläne Städtche, do hann ich ab un zu

Häämweh un ich trääm alsmol vum alde Otterberch.

Die Kinnerzeit, die kehrt zurück, grad wann du älder wersch.

 

Moi Elternhaus, des steht noch do, doch nimmi so, wie’s war.

Am Gääßeberch, ganz in de Näh, do bin ich Rodler gefahr.

Wo’s Denkmal steht, hann ich im Herbscht moi Säck mit Keschde gefillt,

am Brunne in de Hinnergass de Dorscht vum Tobe gestillt.

 

Otterberch, du liebes aldes Goldstick in de Palz,

du bisch mer so ans Herz gewachs, moi Städtche, Gott erhalt’s.

Un bin ich heit aa fort, so bleibsch du doch e Teil vun  mir.

Moi Kindheit un moi Jugendzeit, die war’n  so schää bei dir,

bei dir moi liebes ald Wallonestädtche.

 

Es Schwimmbad hann mer domols nur de Badweiher genennt.

Im Sommer sinn mer jede Daa stracks dorthie gerennt.

Es Wetter war uns ganz egal, oft war’n die Lippe blau.

Sunndags war’s gerammelt voll, das wäß ich noch genau.

 

Otterberch, du liebes aldes Goldstick in de Palz, …

 

Un wann ich heit mol herkumm, geht’s gleich an’s Elterngrab.

Bin zusammen mit den beide, denne ich zu danke hab

fer die froh un sorglos Kindheit, die se mir bereitet hann,

fer die schää Zeit do im Städtche, des mer werklich gern hann kann.

 

Drum werd nie vergesse, wie’s war als kläner Bu.

Un no moi’m kläne Städtche, do hann ich ab un zu

Häämweh un ich trääm alsmol vum alde Otterberch.

Die Kinnerzeit, die kehrt zurück, grad wann du älder wersch.

 

Otterberch, du liebes aldes Goldstick in de Palz, …



Otterberger Lieder