Ich denk so oft on Otterberg

 

von Günter Mannweiler

 

Ich denk so oft on Otterberg,

fong o se simmeliere.

Meu Kindheit un moi Jugendzeit

duhn donn vebeispaziere.

Ich sieh vor mer donn die alt Kerch,

die Mauere, die dicke,

die Fachwerkhaiser drumerum,

wo dicht zusommericke,

es Railche mit de Sondstäätrepp,

die Gass mit Plaschderwagge,

die Siedlunghaiser, newedroo

die alte Wohnbaragge,

de Weiherdomm, die Hinnergass,

de Wasem un die Badstubb

un's Krause Loch, wo’s mondags als

geroch hot no de Worschtsupp,

de Baadweiher m'em Briggelche,

de Schlossbersch mit de Keschde.

Im Herbschd honn mer se selbsch gelees.

So schmecken die om beschde!

Die Ringelo vum Wingertsbersch

war'n immer sieß un knaggisch,

die Frihäppel vum Longebusch

eher sauer un gonz plaggisch.

Ich denk als on die Lehmekaut,

do bin ich uff die Welt kumm

un unne on de Eselsbach

gekrawwelt uff de Bääm rum,

on's Stromere om Gääsebersch,

on's Drachesteie losse,

on's Klettere im Stääbruch drauß

un meu verriss'ne Hosse

on's Rodele om Rotebersch,

on's Bolze in de Gasse,

on's Kersche stränze un debei

on's 'Uff-de-Schitz-uffbasse'.

Die Milch hot's noch beim Bauer gäbb,

omens im Millichkännche

un Gutsjer, Waffle, Kaugummi

om Marktplatz, om klää Stännche.

War dorschdisch mol die Kinnerkehl

vum Doowe un vum Renne,

hott unne mer im Lochbrunne

frisch Wasser trinke känne.

Wollt als die Stadt mol ab un zu

Wasser un Strom abstelle,

do muscht de Jakob uff de Gass

die Neiichkäät ausschelle.

Om Eck hot er die Schell geschwung,

die Nachricht unner's Volk gebrung:

„Es werd bekonntgäbb, Leit, honn acht:

de Strom fallt aus bis Uhre acht!“

Mei erschter Kuss hat’s domols gäb

wo’s uff de Bersch geht, uff de Trepp.

Was hat des Herz do wild gebumpt

und in de Ohre hat’s gesummt!

Des sinn so Sache, wo ich heit

noch wääß aus meuner Kinnerzeit.

Die war so schää un sorjefrei,

doch leider viel zu schnell vebei.

Erinnerung bleibt iwwerisch:

Meu Otterberg, wie miss ich Dich!